18/04/2023.- El circuitu de lliteratura d’Asturies, Cultura en Rede incluye 14 actividaes en 13 conceyos pa celebrar a lo llargo de tola selmana’l Día del Llibru.

Factoría Norte va impartir esti martes 18 d’abril el taller d’escritura creativa 25 años de cuentos en Ribadeva y Pintar-Pintar va lleer l’álbum infantil ilustráu El poema que cayó a la mar y va facer depués un taller d’impresión ¡de peces! el 19 d’abril en Villaviciosa.

La biblioneta de Eme de Mar Rojo Teatro va llegar el día 19 a Cangas del Narcea, el día 21 a Cabrales y el 23 a Cangues d’Onís. Alicia Andrés Ramos va ofrecer una esperiencia lliteraria y sensorial en Taza de haikus el 19 d’abril en La Ribera y el 20 en Nava; Carlos Alba Cellero va mostrar les histories de Quixote los díes 19 y 20 en Gozón; y David Acera va narrar La tortuga Todovabién y otras historias de autor el 20 d’abril en Tinéu.

El 21 d’abril va haber un taller de técniques d’ilustración con Asturlibros Gloobal en Balmonte de Miranda, l’actividá De la literatura al cine: aquí viene mi historia con Celia Menéndez Cervero en Llanes y Ediciones Radagast va esplicar cómo crear una historia interactiva en Llaviana en Convertir una historia nun videoxuegu. El día 22 Teatro Plus va mostrar les infinites posibilidaes del pan pa crear personaxes de delles formes y tamaños en Ribeseya n’Amasando personajes.

Nel marcu del circuitu de lliteratura, esti primer semestre del añu programáronse 74 eventos de 30 creadores en 32 conceyos. Los circuitos d’Asturies, Cultura en Rede son un proyectu de la Conseyería de Cultura, Política Llingüística y Turismu, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.